SKM

XX asırda olıp keçken facialardan biri, tek Firavun ğaddarlığınen qıyaslanması mumkün olğan, qorqunçlı zalımlıq misali qırımtatar xalqınıñ sürgünligidir. Bu genotsid qırımtatar xalqınıñ dinî, medenî, intelektual ve nufuzî mirasını yoq etti. Közboyama aqlanğan xalqnıñ rahat yaşayışında tecrübeli közetici 60 yıl evvel başlatılğan genotsidniñ “muvafaqıyetli” ve “semereli” devamını körecektir. Medenî ve dinî mirasımıznıñ ğayıp etilmesi sebebinden xalqımıznıñ ekseriyeti özüne xas olğan çizgilerini ve unikalligini coymaqta; neticede dertli xalqımıznıñ ögünde peyda olğan manevî boşluq çeşitli asılsız ve boş zevqlernen toldurılmaqta. Xalq tamırlarını añdırğan menbaalarnıñ eksikligi, bu menbaalarnı doğru şekilde taqdim etip ögge sürgen insanlarnıñ azlığı milletimizniñ yırtılğan kilimniñ şekilsiz parçalarına beñzemesine yol açacaqtır. Bu 1944 senesinde keliştirilgen xain plannıñ “parlaq” zaferinen, yani tarih içün 60 sene kibi pek qısqa bir sürede bütün xalqnıñ yoq etilmesinen bitecektir. 

Böyle ketişatnıñ soñu pek acınıqlı olmasınıñ imkâniyeti bar olğanından sebep QYC teşkilâtı dünyamıznıñ eñ muşkül yerlerinden biri olğan Qırım yarımadasında şaraitlerniñ tarafsız qararlanmasını, Qırım xalqınıñ rahat ve tınç hayatını sürmesini, ne insanlarnıñ ne de kelip keçken zamannıñ hakim olmağan soñsuz, haq ve ebedî qıymetlerni yaşayşqa keçirmesini maqsadlarında tuta.

Qırımtatar xalqınıñ diniy şuurını saqlamaq, ruxî seviyesini yükseltmek, içtimaî haq, hurriyet ve menfaatlarını qorçalamaq teşkilâtımıznıñ esas qıymetleridir.